বাঁশখালী টাইমস্ ডেস্ক:
বাঁশখাইল্যা ভোডর হবর: ভোটভোটানি!
ভোট হই হই এতদিন পরান দি ফালাইয়ে বাশখাইল্যা মাইনষে! আজিয়া হাছা হাছা ভোট দিতু যাই পরান দের বুলি উনিলাম!
ভোট ডাহাতির হবর আগে লতি এক্কানা এক্কানা উনা গেইল। জোহরত্ত অইতে অইতে পুরা বাশখালী ভোট ডাহাতি শুরু অই গেইয়ে!
ছনুয়ার খুদুকখালি যে যারে যিন্দি পাইয়ে মাইরগে বুলি হর!
পুইছড়িত লেদু মিয়া বলে এজেন্ট অলরে নিজে বাইর গরি দিয়ে!
শে’রখীলত ইছাক উজুর আছে বুলি আইজু কিছুটা শান্তিত আছে!
গন্ডামারাত লিয়াকতরে এরেস্ট গরি নাকি আবার ছাড়ি দিইয়ে!
চাম্বলত শিবির উদ্দা ছাত্রলিগে মারামারি শুরু অইয়ে বুলি হবর পাইলাম!
শীলকুপুত মাইত্য উডি বলে আবার ঠান্ডা অই গেইয়ে!
অরল তো এব্বে ঝুঁকিপূর্ণ আছিল। পুলিশ উদ্দা ভোটার অলে হোথাই মারামারি অইয়ে বুলি উনিলাম!
কাথাইরগা লইরে আগে লতি ডর আছিল। এক্কানা আগে তিউন্না গুলি মারি হসপিটালত ফাটাই দিয়ে বুলি হর! ফেসবুকত ছবি দেহিলাম!
বইলছড়িত শান্তিপূর্ন অইবার হথা থাহিলেও ৪ লম্বর ওয়ার্ডত ভেজাল লাইগ্যিল। হামেদিয়াত রাতিয়া সিল মারি রাইখ্যে বুলি হদ্দে ইয়ান হাছা নে হনে জানে!
হালিপুরত নাসেরা হাতুন মেইফুয়ার ইস্কুলত ত ভোট বন্ধ আছিল! পরে বলে আবার চালু অইয়ে!
সাধনপুরত গম গরি ভোট চইল্লে উনিলাম।
বাহারচরাত এক্কানা আধগানা মাইর চইল্লে বুলি ফেসবুত দেইলাম!
খানখানাবাদতও ঝামিলা লাইগ্যিল বুলি হর। এখন নাকি ঢান্ডা অবস্থা!
পুকুরিয়াত মারামারি চইল্লে, ভোট বন্ধ অইয়িল।
হবর আসলে বঅত ঢুইল্লা উনির। উইন্না হথা আর হতো! আজুইন্নার পর রাতিয়া আসল হবর বাইর অবু। এতন পইয্যন্ত অপেক্ষা গরি।
চাই, হোয়াল আঁরার গান হদ্দুর পোড়ে!
